ՀԱՅՏԱՐԱՐՈՒԹՅՈՒՆ. ՀԵՏԱԶՈՏԱԿԱՆ ԱՇԽԱՏԱՆՔՆԵՐ ԻՐԱԿԱՆԱՑՆԵԼՈՒ ՄՐՑՈՒՅԹ «ԱՄԵՐԻԿՅԱՆ ՀԵՏԱԶՈՏՈՒԹՅՈՒՆՆԵՐ» (AMERICAN STUDIES) ԴՐԱՄԱՇՆՈՐՀԱՅԻՆ ԾՐԱԳԻՐ
Երևանի պետական համալսարանը ՀՀ-ում ԱՄՆ դեսպանատան կողմից ֆինանսավորվող «Ամերիկյան հետազոտություններ» (American Studies) դրամաշնորհային ծրագրի շրջանակներում հայտարարում է ամերիկագիտության բնագավառին վերաբերող հետազոտական աշխատանքների մրցույթ. մասնավորապես, խրախուսվում են ԱՄՆ ժամանակակից հասարակական- քաղաքական իրողություններին, տնտեսությանը և բիզնեսին, քաղաքացիական հասարակությանը, միջազգային և տարածաշրջանային հարթություններում ԱՄՆ ներգրավվածությանն ու դերակատարությանը, ամերիկյան հոգևոր-մշակութային կյանքին, ինչպես նաև ԱՄՆ պատմության առանձին դրվագներին վերաբերող հետազոտություններ:
Մրցույթի նպատակներն են՝
- Ընդլայնել և հարստացնել ամերիկագիտական հետազոտությունների գիտահետազոտական ներուժը,
- Խրախուսել ամերիկագիտության բնագավառում ակադեմիական և կիրառական բնույթի հետազոտությունների իրականացումը:
Մրցույթին մասնակցելու համար հրավիրվում են ամերիկագիտության կամ հարակից ակադեմիական գիտակարգերի բնագավառում գիտահետազոտական հետաքրքրություններ և փորձ ունեցող հետազոտողներ:
Մրցույթին մասնակցության պայմաններն են`
- Մրցույթում հաղթող ճանաչված թեմատիկ հետազոտական աշխատանքները իրականացնելու վերջնաժամկետը` 2022թ. մայիսի 30:
- Հաղթող ճանաչված հայտերի նախատեսվող ֆինանսական աջակցությունը` մինչև 3500 ԱՄՆ դոլարին համարժեք ՀՀ դրամ:
Մրցույթի մասնակիցներին ներկայացվող պահանջներն են`
- Առնվազն երեք տարվա գիտահետազոտական փորձառություն.
- Գիտական աստիճան հասարակական գիտությունների ոլորտում.
- Միջազգային ակադեմիական հետազոտական փորձառությունը կդիտվի որպես առավելություն.
- Հետազոտական խմբի կողմից հայտ ներկայացվելու դեպքում առաջնահերթությունը կտրվի երիտասարդ գիտաշխատողների ներգրավվածությամբ հետազոտական նախագծերին:
Մրցույթին մասնակցելու համար անհրաժեշտ է ներկայացնել`
- ինքնակենսագրական (CV).
- գիտական հետաքրքրությունների շրջանակի (Statement of Interests) նկարագրություն՝ 3-5 էջի սահմանում.
- հետազոտական առաջարկ (Research Proposal)` առավելագույնը 1500 բառի սահմաններում` առաջարկված թեմատիկաներից որևէ մեկի շրջանակում:
Մրցույթի մասնակիցներն իրենց դիմումները կարող են ներկայացնել ԵՊՀ միջազգային համագործակցության վարչություն, կամ ուղարկել էլեկտրոնային տարբերակով՝ «Ամերիկյան հետազոտություններ» ծրագրի ղեկավար, պրոֆ․Ալ․ Մարգարովին՝ amarkarov@ysu.am և «Ամերիկյան հետազոտություններ» ծրագրի համակարգող, ԵՊՀ Ամերիկյան հետազոտությունների կենտրոնի տնօրեն, դոցենտ Վ․ Ագլյանին՝ aglyan@gmail.com, էլեկտրոնային փոստի հասցեներին:
Մրցույթի մասնակիցների դիմումների ընդունման վերջնաժամկետը` 2021թ. hոկտեմբերի 29: