ԱՐՏԱՔԻՆ ՀԱՄԱԳՈՐԾԱԿՑՈՒԹՅԱՆ ԿԵՆՏՐՈՆ

Շիրակի պետական համալսարանի 2023-2027թթ. զարգացման ռազմավարական ծրագրի համապատասխան հիմնադրույթների արդյունավետ իրականացումն ապահովելու նպատակով 2023 թվականի մայիսին Հոգաբարձուների խորհրդի որոշմամբ լուծարվեց Արտաքին համագործակցության և հասարակայնության հետ կապերի կենտրոնը և հաստատվեց Արտաքին համագործակցության կենտրոնը (այսուհետ՝ Կենտրոն)՝ նոր հաստիքներով ու գործառույթներով:

ՇՊՀ-ն (նախկին՝ ԳՊՄԻ) միջազգային համագործակցության ծրագրերում ներգրավված է եղել դեռևս 1990-ական թվականների երկրորդ կեսից, սակայն այդ աշխատանքների ընդհանուր համակարգման ու ինստիտուցիոնալացման նպատակով 2005-ին հիմնել է Արտաքին կապերի և բարեփոխումների բաժինը (հիմնադիր վարիչ՝ Հ. Մելքոնյան): Այդ բաժնի հիմնական գործառույթներից մեկն արդեն հաստատված արտաքին համագործակցության ծրագրերի շարունակականության, ինչպես նաև նոր ծրագրերում բուհի ներգրավվածության ապահովումն էր: Բաժնի առաջադիր մյուս նպատակն այդ տարիներին Հայաստանի բարձրագույն կրթության ոլորտում մեկնարկած բարեփոխումների, Բոլոնիայի գործընթացի գործողությունների հիմնական ուղղություններին համահունչ կրթական համակարգի մշակման ու ներդրման աշխատանքների համակարգումն էր:

Բուհի գործունեության բոլոր ոլորտներում իրականացվող աշխատանքների լուսաբանման ու հանրայնացման նպատակով 2012-ին բուհում հիմնվել է Հասարակայնության հետ կապերի ու լրատվության բաժինը (հիմնադիր վարիչ՝ Ա. Մարտիկյան), ոը համակարգում էր նաև 2007-ից գործող Ուսանողական ստուդիայի աշխատանքները:

Արտաքին կապերի և բարեփոխումների բաժինը 2013-ին վերանվանվել է Արտաքին կապերի բաժին (վարիչներ՝ Լ. Մարգարյան, 2013-2016թթ., Ա. Հարությունյան, 2016-2019թթ.):

Արտաքին համագործակցության կենտրոնի աշխատանքները 2018 թվականից ցայսօր ղեկավարում է տնօրեն Հ. Մելքոնյանը:

Կենտրոնի հիմնական նպատակն է՝ որակի կառավարման ՊԻԳԲ շրջափուլի հետևողական կիրառմամբ ու համապարփակ ապահովմամբ խթանել բուհի միջազգայնացումը և սոցիալական գործընկերությունը, բարելավել տրամադրվող ծառայությունները: Այդ նպատակի իրականացման համար Կենտրոնն ունի հետևյալ հիմնական գործառույթները.

Հանրությանն իրազեկում է Համալսարանի նպատակների ու գործունեության հիմնական ոլորտների, իրականացված ու նախատեսվող գործողությունների մասին:
Մշակում և ներդնում է Համալսարանի արտաքին համագործակցությանն ու միջազգայնացմանն ուղղված ռազմավարություն, համապատասխան ընթացակարգեր և կազմակերպում ու համակարգում դրանց իրականացման գործընթացը:
Ներկայացնում է առաջարկություններ Համալսարանի տեղեկատվական, գովազդային քաղաքականության ընթացակարգերի լավարկման վերաբերյալ՝ հիմք ընդունելով «ՇՊՀ կանոնադրությունը», «ՇՊՀ զարգացման ռազմավարական ծրագիրը»:
Հնարավորինս արագ արձագանքում է հետադարձ կապի միջոցով ներքին ու արտաքին շահառուներից ստացված հաղորդագրություններին ու հարցումներին:
Հանրության շրջանում տեղեկատվություն է տարածում Համալսարանում գործող մասնագիտությունների վերաբերյալ՝ տեսանյութերի, տպագիր նյութերի, աշխատանքային այցերի և այլ միջոցներով:
Արտաքին շահառուների համար կազմակերպում և համակարգում է կրթական խորհրդատվական ծառայություններ, վերապատրաստումներ՝ ըստ համապատասխան ոլորտների:
Իրազեկում է Համալսարանի կառուցվածքային ստորաբաժանումներին հանրապետական ու միջազգային համագործակցության ծրագրերի մասին:
Կազմակերպում և համակարգում է Համալսարանի արտագնա և ներգնա շահառուների՝ հանրապետական և/կամ միջազգային ակադեմիական շարժունության ու փոխանակման ծրագրերին դիմելու, մասնակցելու գործընթացը:
Խթանում և լուսաբանում է ՇՊՀ-հանրություն կապերի ընդլայնումն ու բազմազանեցումը, ինչպես նաև դրանց իրականացման որակի բարելավումը՝ «Համալսարանական լրագիր» պարբերական ծրագրի, հաղորդումների, ՇՊՀ կայքէջի ու սոցիալական ցանցերի միջոցով (YouTube, Facebook, LinkedIn, Instagram, Twitter):
Կազմակերպում և համակարգում է Սփյուռքի հայկական համայնքների հետ համագործակցություն հաստատելու աշխատանքները: 4.16. Իր գործառույթների շրջանակներում աջակցում է որակի ներքին ապահովման, կառավարման և մշտադիտարկման աշխատանքներին:

Շնորհիվ արտաքին համագործակցության և հասարակական իրազեկման աշխատանքների ինստիտուցիոնալացման՝ ՇՊՀ-ն ապահովում է իր շարունակական ներգրավվածությունը միջազգային համագործակցության ծրագրերում, հանրապետության բուհական համայնքի կողմից իրականացվող աշխատաժողովներում ու տարաբնույթ միջոցառումներում, արտաքին ու ներքին շահառուների և շահակիցների, ինչպես նաև մարզային ու պետական լրատվամիջոցների հետ սերտ գործընկերության աշխատանքներում:

Մինչև այսօր ՇՊՀ-ն մասնակցել է Եվրամիության Էրազմուս+ (նախկին՝ Տեմպուս, Էրազմուս) և միջազգային այլ կազմակերպությունների կողմից ֆինանսավորվող շուրջ 25 դրամաշնորհային ծրագրերի աշխատանքներին, ինչի շնորհիվ հարստացել ու արդիականացել է բուհի նյութատեխնիկական բազան, մշակվել ու ներդրվել են ժամանակակից մասնագիտական կրթական ծրագրեր (ՄԿԾ), հիմնվել են նոր կառուցվածքային ստորաբաժանումներ: Մասնավորապես՝

Որակի ապահովման բաժինը,
Ուսանողների աջակցության, բուհ-գործատու համագործակցության բաժինը,
Ուսանողական ստուդիան,
Սոցիալական աշխատանքի կրթական կենտրոնը,
Օտար լեզուների ուսուցման կենտրոնը,
Կենսատեխնոլոգիայի լաբորատորիան,
Բանականության բանալի ակումբը,
ԵՊՀ հեռաուսուցման լաբորատորիայի Գյումրու մասնաճյուղը,
Սոցիալական աշխատանքի բակալավրի ու մագիստրատրոսական ՄԿԾ-ները,
Կենսատեխնոլոգիայի մագիստրոսական ՄԿԾ-ն,
Կայուն զբոսաշրջության մագիստրոսական ՄԿԾ-ն.
ՇՊՀ-ն մշակել և ներդրել է աշխատանքի վրա հիմնված ուսումնառության (ԱՀՈւ) մոդելը և համապատասխան ուղեցույցը,
Մասնակցել է ՀՀ բուհերի միջազգայնացման ու մարքեթինգի խթանման հայեցակարգի, որակավորումների ազգային ու ոլորտային շրջանակների մշակման ու ներդրման աշխատանքներին:

Կենտորնն այսօր էլ շարունակում է ՇՊՀ-ի ՌԾ-ով նախանշված՝ բուհի միջազգայնացման, սոցիալական գործընկերության հաստատման և դրա շրջանակների ընդլայնման ու բազմազանեցման, ինչպես նաև արտաքին ու ներքին շահառուներին մատուցվող ծառայություններին առնչվող աշխատանքները: Մասնավորապես՝ համագործակցության պայմանագրեր են կնքվել ու վերակնքվել ավելի քան 30 եվրոպական, շուրջ 60 ԱՊՀ ու ՀՀ գործընկեր համալսարանների և այլ կազմակերպությունների հետ:

Վերջին հինգ տարիների ընթացքում մասնագիտական վերապատրաստման դասընթացներ են անցկացվել շուրջ 70 դպրոցների ու նախակրթարանների տնօրենների, ՀՀ տարբեր մարզերի ավելի քան 450 ուսուցիչների համար:
Կենտրոնն ապահովում է ՇՊՀ-ի պաշտոնական կայքէջի և սոցիալական ցանցերի կանոնավոր աշխատանքը՝ ամենօրյա ռեժիմով հանրությանն իրազեկելով բուհի աշխատանքների, անցկացվող տարաբնույթ միջոցառումների մասին: