«Խաղաղության գինը» խորագրով միջոցառում ՇՊՀ-ում
Սեպտեմբերի 26-ին Շիրակի պետական համալսարանը և Գյումրու կայազորը համատեղ իրականացրեցին «Խաղաղության գինը» խորագրով միջոցառում՝ նվիրված լեյտենանտ Գուրգեն Մարգարյանի ծննդյան 40-րդ տարելիցին:
Հայազգի լեյտենանտը 2004 թվականին մասնակցում էր ՆԱՏՕ-ի «Գործընկերություն հանուն խաղաղության» ուսումնական դասընթացներին, երբ քնած ժամանակ սպանվեց ադրբեջանցի սպա Ռամիլ Սաֆարովի կողմից:
Խաղաղության և հերոսության ընկալումները տարբեր են հարևան երկրներում: Հայկական կողմից խաղաղության պարտադրանքը ևս մեկ անգամ շեշտելու, Գուրգեն Մարգարյանի հիշատակը հարգելու նպատակով անցկացվող միջոցառումը մեկնարկեց ՇՊՀ բակում Գյումրու կայազորի զինվորական նվագախմբի ելույթով:
Շիրակի մայր բուհի դահլիճում իր աշխատանքների ցուցադրությամբ խաղաղություն էր քարոզում Արտակ Թադևոսյանը: Գյումրեցի արվեստագետը տարբեր տրամաչափերի պարկուճներից կանացի խորհրդանշական զարդեր է պատրաստում՝ բոլոր զենքերը զարդերի վերածելու նշանաբանով:
Գուրգեն Մարգարյանի կյանքի և ողբերգական օրվա մասին հիշատակումները ցավալի ու հուզիչ են, բայց միևնույն ժամանակ դաս են հայերիս համար՝ խաղաղություն պարտադրելու հարևան երկրին:
Շիրակի պետական համալսարանում խաղաղության կոչով հանդես եկան համալսարանի և քաղաքային ու մարզային իշխանության ներկայացուցիչները:
Համալսարանի ճեմասրահում էլ ընթացան զենքի քանդման-հավաքաման, շախմատի և շաշկիի մրցույթներ՝ զինվորների և ուսանողների մասնակցությամբ: Մրցույթում լավագույն արդյունք ցուցաբերած մասնակիցները պարգևատրվեցին, իսկ միջոցառման ավարտն ազդարարվեց ամբողջ աշխարհին խաղաղության և համերաշխության կոչով: