«Ամառային դպրոց ՇՊՀ-ում» ծրագրի երկրորդ փուլը շարունակվում է
Շիրակի պետական համալսարանի կողմից կազմակերպված «Ամառային դպրոց ՇՊՀ-ում» ծրագրի երկրորդ փուլի երկրորդ օրը մարզի տարբեր համայնքներից ժամանած աշակերտներն սկսեցին մի փոքր անսովոր պայմաններում: Համալսարանի Ռազմական ամբիոնն էր իր հյուրընկալ դռները բացել նրանց առաջ:
Աշակերտներից հիմնականում աղջիկները հաճելիորեն զարմացած էին՝ տեսնելով զինվորական կրթություն ստացող նույն սեռի ներկայացուցիչներին:
Օրվա բանախոսը նույնպես ամբիոնի ուսանողուհի էր, ով ներկայացրեց իր ստացած գիտելիքները ռազմական ոլորտից:
Ռազմական ամբիոնի դասախոս, փոխգնդապետ Գագիկ Հովհաննիսյանն էլ ներկայացրեց ամբիոնի ստեղծման և անցած ճանապարհը, խոսեց զինվորականի մասնագիտության կարևորության և առաքելության մասին:
Այնուհետ նրա ուղեկցությամբ աշակերտները եղան զինանոցում, ծանոթացան որոշ զինատեսակների և դրանց կիրառության առանձնահատկություններին:
Պատանիներն այցելեցին նաև ՇՊՀ-ի քոլեջ, ուր նրանց դիմավորեց և բարի գալուստ մաղթեց Դաստիարակչական աշխատանքների գծով փոխտնօրեն Աստղիկ Բաղդասարյանը: Նա ներկայացրեց քոլեջի առօրյան ու մասնագիտությունները՝ հորդորելով աշակերտներին իրենց հետագա ուսումնառությունը շարունակել քոլեջում:
Էլ ինչ ամառային դպրոց, առանց ակտիվ հանգստի: Աշակերտների օրվա վերջին կանգառը Մարմաշեն վանական համալիրն էր, որտեղ ՇՊՀ-ի Աշխարհագրության և սերվիսի ամբիոնի դասախոս Քաջիկ Հարությունյանը նրանց ներկայացրեց վանքային համալիրի պատմությունը: