ՇՊՀ ռեկտորի պարտականությունները կատարող Երվանդ Սերոբյանի ուղերձը մագիստրոս-շրջանավարտներին
Այսօր տոն է Շիրակի պետական համալսարանում. մենք կյանքի ուղեգիր ենք տալիս մագիստրոսների արդեն 9-րդ սերնդին: Բազմաթիվ մտավորականների ինքնահաստատման և ինքնաճանաչման լուսավոր մի դարբնոց է եղել մեր բուհը և այսօր էլ շարունակում է լինել այդպիսին: Համալսարանը միշտ առաջ է ընթացել իր պատվախնդիր առաքելության հստակ գիտակցումով՝ կրթության ու գիտության հարկն իմացող շիրակցու համար լինելով ուղենիշ: Շիրակի մայր բուհն իր գործունեությունը մշտապես ծավալել է նորի առջև իր խոնարհումով և ավանդականի հանդեպ իր ակնածանքով՝ հյուսիսային Հայաստանի և Ջավախքի համար լինելով ուսումնագիտական և կրթամշակութային առաջատար կենտրոն: Մենք հետայսու էլ պարտավոր ենք առավել մեծ պատասխանատվությամբ կրելու համալսարանականի մեր անունը:
Միշտ հիշեք, որ այսօր էլ մեր բուհը հաստատակամ քայլերով գնում է ի’ր ճանապարհով, իրականացնում է կրթական առաքելություն, որն առավելապես միտված է աշխատանքային միջավայրի պահանջներին:
Այսօր էլ, սիրելի´ մագիստրոսներ, ձեզ ենք ճանապարհում մեծ կյանք, ճանապարհում ենք ծնողական գորովով, ձեր մասնագիտական պատրաստվածության և մարդկային նկարագրի հանդեպ անվերապահ հավատով և վստահ, որ ձեզանից յուրաքանչյուրն իր գործունեության մեջ կլինի լավագույնը, օրինակելին՝ ի բարօրություն մեր ոգեկորով հայրենիքի: Հավատացած եմ՝ կյանքը ձեզ ուր էլ որ տանի, դուք ցանկացած ասպարեզում կկարողանաք բարձր պահել մեր բուհի հեղինակությունը:
Շնորհավորում եմ ձեզ, սիրելի մագիստրոսներ, այս տոնական օրվա առթիվ, թող հանձնվող դիպլոմները լինեն ձեր հետագա առաջընթացի երաշխիքը: Շնորհավորում եմ նաև ձեզ, սիրելի´ ծնողներ, ձեր զավակների կարևոր ձեռքբերման համար: Շնորհավորանքներիս միանում է ողջ համալսարանը՝ իր պրոֆեսորադասախոսական կազմով: Ցանկանում եմ ձեզ հաջողություններ, անսպառ ուժ ու եռանդ, աննկուն կամք և հաստատակամություն ձեր բարի ձեռնարկումների մեջ՝ ի հզորացում մեր ոգենորոգ հայրենիքի:
Բարի երթ ձեզ, սիրելի մագիստրոսներ …