ՇՊՀ ռեկտորի ԺՊ Ե. Սերոբյանի Ամանորյա ուղերձը
Սիրելի՛ հայրենակիցներ,
Ավարտվեց 2020 թվականը` աշխարհի պատմության մեջ հիշատակվելով որպես համավարակի, տնտեսական ճգնաժամի, քաղաքակրթական վերադասավորումների տարի: Հայերիս համար այն կրկնակի ծանր էր, պատուհասեց նաև նոր սերնդի պատերազմը: Մեր ուսանողներից ու շրջանավարտներից շուրջ 3 տասնյակը բազում հերոս հայորդիների հետ միացան անմահների գնդին՝ մեզ թողնելով հզոր պատգամ, որ ապրողներս իրավունք չունենք պառակտվելու, հուսալքվելու, կոտրվելու և պայքարի զենքերը վայր դնելու
Դժգույն գիշերին միշտ հաջորդում է խոստումնալի լուսաբացը: 2021 թվականը լինելու է մարտահրավերների, պայքարի և հաղթանակների տարի: Այդ մարտահրավերներին դիմակայելու ենք աշխատանքով, ամեն մի խնդրի մեջ նոր հնարավորություններ տեսնելով: Մեր հավաքական ուժը պետք է վերամարմնավորվի և արարի ստեղծագործ մտքի հզոր իրողություններ: Նահանջի ճանապարհ չունենք, մենք դատապարտված ենք ավելի հզոր լինելու, մենք դատապարտված ենք հաղթանակներ տանելու ինքներս մեր նկատմամբ, և այնժամ կհաղթահարվի ցանկացած թշնամի ու խոչընդոտ:
Թո՛ղ 2021 թվականը լինի նոր ժամանակաշրջանի մեկնարկ՝ խաղաղ երկնքով ու ստեղծարար աշխատանքով:
Մաղթում եմ խաղաղություն և բարօրություն մեր ՀԱՅՐԵՆԻՔԻՆ և յուրաքանչյուր հայի ընտանիքին: