Իրազեկման հանդիպում՝ պրակտիկային ընդառաջ
Շիրակի պետական համալսարանի նիստերի դահլիճում, պրակտիկայի մեկնարկին ընդառաջ, տեղի ունեցավ տեղեկատվական հանդիպում բոլոր ֆակուլտետների և Ռազմական ամբիոնի 4-րդ կուրսի ուսանողների համար։
Ավարտական կուրսերի ուսանողների համար նախատեսված պրակտիկան կտևի հինգ շաբաթ և նպատակ ունի ուսանողներին հնարավորություն ընձեռելու ուսումնառության ընթացքում ձեռք բերած տեսական գիտելիքները կիրառել գործնականում՝ զարգացնելով մասնագիտական կարողություններն ու հմտությունները։
Հանդիպման սկզբում Ուսանողների աջակցության, բուհ-գործատու համագործակցության բաժնի պետ Վահրամ Էլոյանը ներկայացրեց ուսանողների համար գործող պետական և ներբուհական զեղչերի համակարգը՝ անդրադառնալով դրանց առանձնահատկություններին և օգտվելու պայմաններին։
Այնուհետև Ուսանողների աջակցության և պրակտիկայի կազմակերպման պատասխանատու Ինեսսա Գալստյանն ուսանողներին ներկայացրեց պրակտիկայի հիմնական նպատակներն ու խնդիրները, դրա կազմակերպման և անցկացման ընթացակարգը։
Հանդիպման ընթացքում ուսանողներին տրամադրվեց անհրաժեշտ տեղեկատվություն՝ պրակտիկան արդյունավետ և պատասխանատու կերպով կազմակերպելու և իրականացնելու համար։
Հանդիպումն անցավ ակտիվ հարց ու պատասխանի մթնոլորտում:
