Տեղի ունեցավ SMARTI ծրագրի շրջանակներում անցկացվող վերապատրաստումների վերջին փուլը
Շիրակի պետական համալսարանում ապրիլի 13-14-ին անցկացվեց Էրազմուս+ SMARTI ծրագրի շրջանակներում նախատեսված վերապատրաստումների վերջին փուլը, որը միտված էր կրթական ծրագրերի և առանձին դասընթացների /մոդուլների վերջնարդյունքների սահմանմանը և ECTS-կրեդիտներ հատկացնելու առանձնահատկություններին:
Վերապատրաստմանը մասնակցում էին ՇՊՀ դեկանները, ամբիոնների վարիչները և մի շարք դասախոսներ: Բացման խոսքով հանդես եկավ ծրագրի ՇՊՀ համակարգող Հովիկ Մելքոնյանը, մասնակիցներին հաջողություն մաղթեց նաև ՇՊՀ ռեկտոր Երվանդ Սերոբյանը:
Վերապատրաստումն անցկացրեց SMARTI ծրագրի աշխատանքային խմբի անդման, ՇՊՀ ուսումնամեթոդական գործընթացի կառավարման կենտրոնի տնօրեն-պրոռեկտորի ՊԿ Նազելի Ավետիսյանը:
Առաջին օրը մասնակիցներին ներկայացվեցին և քննարկվեցին ուսումնական ծրագրերի նպատակների և կրթական վերջնարդյունքների սահմանման առանձնահատկությունները, կրեդիտների բաշխման հիմնական սկզբունքները՝ Պորտոյի համալսարանում ձեռք բերված եվրոպական բուհերի՝ տվյալ ոլորտների դրական փորձը հաշվի առնելով:
Մասնակիցներին հանձնարարվեց գրել և հաջորդ գործնական հանդիպմանը համատեղ քննարկման ներկայացնել մեկ կրթական ծրագրի և իրենց կողմից դասավանդած մեկ դասընթացի/մոդուլի նպատակ ու կրթական վերջնարդյունք:
Վերջին օրը ներկայացվեցին ու քննարկվեցին ինչպես մասնակիցների կողմից կատարված առաջադրանքները, այնպես էլ SMARTI ծրագրի շրջանակներում առաջիկայում նախատեսված աշխատաքները: