«Լավագույն ուսանող» մրցույթի հաղթողները հպարտություն և օրինակ են ուսանողական համայնքի համար

Հայաստանի Հանրապետության բարձրագույն մասնագիտական կրթական ծրագրեր իրականացնող ուսումնական հաստատությունների լավագույն առաջադիմությամբ ուսանողների անվանական կրթաթոշակների տրամադրման՝ 2024 թվականի մրցույթի երկրորդ փուլի մրցութային հանձնաժողովն իրականացրել է մրցույթին ներկայացված փաստաթղթերի փորձաքննություն, որի հիման վրա էլ ամփոփվել են մրցույթի արդյունքները և որոշվել համապատասխան ոլորտների հաղթողներին:

Շիրակի Մ.Նալբանդյանի անվան պետական համալսարանից «Լավագույն ուսանող» մրցույթի  հաղթողներ են ճանաչվել  «Ֆիզիկական դաստիարակություն և սպորտային մարզումներ» մասնագիտության մագիստրատուրայի  2-րդ կուրսի ուսանող Մելինե Ռուբենի Գալոյանը  մշակույթ — սպորտի ոլորտում՝  1–ին տեղ  և «Հոգեբանություն» մասնագիտության բակալավրի 4-րդ կուրսի ուսանող Աշխեն Ոսկանի Հարությունյանը հասարակագիտության ոլորտում՝ 3-րդ տեղ։

Լավագույն ուսանող» մրցույթը տարիներ շարունակ դարձել է կրթական հաստատությունների և ուսանողական համայնքների համար կարևոր իրադարձություն՝ հնարավորություն տալով արժևորելու գիտելիքը, աշխատասիրությունը և հասարակական ակտիվությունը։

Մրցույթի արդյունքներով գնահատվել են մեր համալսարանի ուսանողների  գիտական, ստեղծագործական, մարզական և հասարակական ձեռքբերումները։
Շնորհավորում ենք մեր ուսանողներին՝ ցանկանալով նորանոր նվաճումներ և ձեռքբերումներ։

Գիտելիքը ուժ է, և այն գործի դնելով՝ մենք կերտում ենք մեր  վաղվա օրը։