Ֆուտզալի առաջնության հաղթողներին հանձնվեցին շնորհակալագրեր
Շիրակի պետական համալսարանն իր հարկի տակ ընդունեց ՀՀ ուսանողական մարզական 26-րդ խաղերի ֆուտզալի առաջնության գավաթակիրներին՝ Գյումրու բուհերի հավաքական թիմի մարզիկներին և մարզիչներին: Նրանց ջերմորեն շնորհավորեցին ՇՊՀ-ի ռեկտոր Երվանդ Սերոբյանն ու ՀՊՏՀ Գյումրու մասնաճյուղի տնօրեն Կարեն Պետրոսյանը և մաղթեցին նորանոր նվաճումներ:
Երկու բուհերի ղեկավարներն ամփոփեցին մարզական ոլորտում իրենց համագործակցության արդյունքներն անցնող տարվա համար՝ նախանշելով և քննարկելով առաջիկա ծրագրերը:
Ֆուտզալի առաջնության մրցանակակիրներին ողջունեց նաև ՇՊՀ-ի Սպորտի և արվեստի ամբիոնի վարիչ Գ. Աղանյանը: Նա խոսեց այն աշխատանքների մասին, որոնց արդյունքում արդեն երրորդ տարին է, ինչ Գյումրիի թիմը գրանցում է հաղթանակներ:
Իսկ Գյումրու բուհերի հավաքական թիմի մարզիչ Ս. Մկրտչյանն էլ առանձնացրեց մարզիկների բարձր պատրաստականությունն ու թիմային աշխատանքը, որի արդյունքը եղավ այս հաղթանակը:
Հանդիպման ավարտին ֆուտզալի առաջնության հաղթողները պարգևատրվեցին շնորհակալագրերով: