Վահան Տերյանի 140-ամյակին նվիրված միջոցառում ՇՊՀ-ում
Շիրակի պետական համալսարանում կազմակերպվել էր Վահան Տերյանի 140-ամյակին նվիրված «Կյանքս այնպես դժվարին էր․․․» խորագրով միջոցառումը։
Գեղեցիկ ու անխարդախ կյանքով ապրելու նվիրական ձգտման արտահայտություն է Վահան Տերյանի ստեղծագործությունը, որի գողտրիկ էջերում բացահայտվում են մարդու հոգեբանության նրբին ծալքերը, ապրելու, արարելու, խորհելու մեջ երջանկանանալու անսահման ցանկությունը: Բանաստեղծությունները, իրար ագուցվելով, հատու վրձնահարվածներով հյուսում են ինքնատիպ ու զարմանալի մի աշխարհ: Վահան Տերյանը բյուրեղացած զգացմունքների երգիչ է։
«Հոգեվիճակի տարբեր դիրքերից բացելով տրամադրության և ասելիքի նորանոր շերտեր ու նրբագծեր՝ այդ ամենը հեղինակն ի մի է բերում մի կայուն առանցքի շուրջ։ Ահա այդ զգացողությամբ էլ Վահան Տերյանը հոգևոր կամուրջ է ստեղծում իր և ժամանակակիցների միջև»,- նշեց միջոցառման կազմակերպիչ Օֆելյա Հովհաննիսյանը՝ հավելելով, որ բոլոր մարդիկ էլ իրենց հոգում ունեն ինչ-որ թանկագին բան Տերյանից՝ քնքշորեն պահպանելով իրենց տերյանական երգը, իրենց սիրած մեղեդին, որը թախիծով օծել է նրանց պատանեկությունը, պայծառ մշուշով պատել նրանց սերը, կարոտները, քաղցր ու տենդագին դարձրել գեղեցիկի որոնումները: