ՇՊՀ-ում կայացավ ֆուտզալի մրցում
Շիրակի պետական համալսարանում պրոֆեսորադասախոսական կազմի և ուսանողների միջև անցկացվեց ֆուտբոլային հանդիպում, որը կազմակերպվել էր Հասարակական գիտությունների ֆակուլտետի Սպորտի և արվեստի ամբիոնի կողմից:
Չնայած ուսանողների համառ և անզիջում պայքարին՝ փորձառությունն ու թիմային կազմակերպվածությունն օգնեցին դասախոսներին գրանցելու հաղթանակ: Խաղի ընթացքում դասախոսները վստահ էին ինչպես պաշտպանությունում, այնպես էլ հարձակման գծում՝ ցուցադրելով գեղեցիկ կոմբինացիաներ և արդյունավետ խաղային մտածողություն: Ուսանողները նույնպես հանդես եկան արժանապատիվ պայքարով՝ մի քանի դրվագներում մրցակցի դարպասի մոտ ստեղծելով լարված իրավիճակներ:
Հանդիպումն ավարտվեց բարեկամական մթնոլորտում՝ ընդգծելով համալսարանի միասնականությունն ու սպորտային ոգին: